विधानसभा सदस्यत्वाची शपथ घेताच आमदार शंभूराज देसाईंचा कामाचा सपाटा. पाटण विधानसभा मतदारसंघातील सर्व शासकीय विभागांचा घेतला आढावा.

 

दौलतनगर दि.07:- मतदारसंघाचा आमदार या नात्याने सातत्याने जनतेत राहणे पसंत करणारे पाटणचे आमदार शंभूराज देसाई हे आपला जास्तीत जास्त वेळ जनतेचे प्रश्न त्यांच्या समस्या मार्गी लावण्याकरीता व्यतीत करीत असल्याचे पाटण मतदारसंघातील जनतेने अनेकदा अनुभवले आहे. सन 2024 च्या विधानसभा निवडणुक निकालानंतर शिवसेना पक्षाच्या बैठकीसाठी तातडीने मुंबईला जावे लागल्याने मुंबईतला मुक्काम वाढल्याने गत बारा दिवस मतदारसंघात येणे शक्य झाले नाही. दि.5 रोजी राज्याचे मुख्यमंत्री ना.श्री.देवेंद्र फडणवीस व उपमुख्यमंत्री ना.श्री.एकनाथजी शिंदे व ना.श्री.अजितदादा पवार यांचा शपथविधी झाल्यानंतर विधीमंडळाचे दि. 07 रोजीचे विशेष अधिवेशनामध्ये विधानसभा सदस्यत्वाची शपथ घेतल्यानंतर चार तासांचा प्रवास करत तात्काळ पाटण विधानसभा मतदारसंघाचे सर्व शासकीय विभागाचे बैठकीसाठी  पाटण येथे उपस्थित होते.

        आमदार शंभूराज देसाई यांचे अध्यक्षतेखाली दौलतनगर ता.पाटण येथे पाटण विधानसभा मतदारसंघातील सर्व शासकीय विभागांची आढावा बैठक आयोजित केली होती.यावेळी उपविभागीय अधिकारी सोपान टोणपे,तहसिलदार अनंत गुरव,श्रीमती कल्पना ढवळे, उपविभागीय पोलीस अधिकारी विजय पाटील, गट विकास अधिकारी सरिता पवार,गट शिक्षणाधिकारी श्रीमती बोरकर, उपविभागीय कृषी अधिकारी, जलसंधारण विभागाचे  कार्यकारी अभियंता,कोयना प्रकल्पाचे कार्यकारी अभियंता पोतदार, सार्वजनिक व जिल्हा परिषद बांधकाम विभागाचे अधिकारी उपस्थित होते.

                सतर्क आमदार म्हणून आमदार शंभूराज देसाईंच्या कार्यपध्दतीचे नेहमीच कौतुक केले जाते.महाराष्ट्र विधीमंडळाच्या विशेष अधिवेशनातून वेळ काढून त्यांनी तालुकास्तरीय सर्व शासकीय विभागांची आढावा बैठक घेतली.या बैठकीमध्ये सन 2023-24 व 2024-25 या दोन आर्थिक वर्षामध्ये राज्य शासनाच्या विविध लेखाशिर्षामधून पाटण विधानसभा मतदारसंघामध्ये विविध विकास कामे मंजूर झाली आहेत. विधानसभा निवडणुकीची आचारसंहिता लागू झाल्यानंतर बऱ्यांच कामांची निविदा प्रक्रिया थांबली होती तर काही कामांची निवीदा प्रक्रिया पूर्ण झाली होती.त्या अनुषंगाने ग्रामीण पाणी पुरवठा विभागाकडील जलजिवन मिशन योजने अंतर्गत मंजूर नळ पाणी पुरवठा योजनांचा आढावा घेत नळ पाणी पुरवठा योजनांचे कामांकरीता वाढीव निधी मंजूर होणेकरीताचे प्रस्ताव शासनास सादर आहेत. निधीची आवश्यकता असलेल्या नळ पाणी पुरवठा योजनांची कामे पूर्ण करण्यासाठी वाढीव निधी मंजूर करण्यासंदर्भात शासनस्तरावर प्रयत्नशील असल्याचे सांगत जिल्हा परिषद बांधकाम विभागाकडील जिल्हा नियोजन समितीमधील मंजूर रस्ते, ग्रामपंचायत इमारती, जनसुविधा योजनेमधील कामे,साकव लघु पाटबंधारे विभागाकडील वळण बंधारे व शेतीसाठी आडवे पाट,पाईप लाईन,साठवण बंधारे ई. कामे व सार्वजनिक बांधकाम विभागाकडील शासकीय इमारतींची बांधकामे,भूस्खलनबाधित गावातील कुटुंबियांना पुनर्वसनाचे ठिकाणी देण्यात येणाऱ्या पक्क्या घरांची बांधकामे तसेच राज्य शासनाच्या अर्थसंकल्प, 2515, प्रादेशिक पर्यटन, कोयना भूकंप, पुरवणी अर्थसंकल्प या लेखाशिर्षामधून मंजूर असलेल्या विकास कामांच्या तातडीने निवीदा प्रक्रिया करण्यात याव्यात तसेच ज्या कामांच्या निविदा प्रक्रिया पूर्ण झाल्या आहेत अशा कामांना तातडीने सुरुवात करण्याच्या सुचना सार्वजनिक बांधकाम विभागाच्या अधिकाऱ्यांना केल्या.तसेच पालकमंत्री म्हणून सातारा जिल्हयामध्ये मॉडेल स्कूल व स्मार्ट प्राथमिक आरोग्य केंद्र या संकल्पना राबवित असताना जिल्हा नियोजन मधून निधीची तरतूद केली असून सदरची  कामे तातडीने सुरु करण्याच्या सुचना करत हिवाळी अधिवेशन संपल्यानंतर विभाग निहाय मंजूर झालेल्या कामांचा आढावा घेण्यात येणार असल्याचे त्यांनी यावेळी सांगीतले.

चौकट:-  मुंबईवरुन 350 किमीचा प्रवास करुनही घेतली तालुकास्तरीय सर्व विभागांची आढावा बैठक.

आजपासून मुंबई या ठिकाणी महाराष्ट्र विधीमंडळाचे विशेष अधिवेशन सुरु झाले.या अधिवेशनामध्ये आमदार शंभूराज देसाई यांनी विधानसभा सदस्यत्वाची शपथ घेऊन तातडीने पाटणकडे रवाना झाले. मुंबई ते पाटण असा 350 किमीचा प्रवास करुनही त्यांनी आज दौलतनगर येथे पाटण विधानसभा मतदारसंघातील सर्व शासकीय विभागांची आढावा बैठक घेत या बैठकीमध्ये त्यांनी पाटण विधानसभा मतदारसंघातील सर्व शासकीय अधिकारी यांचेकडून विभागांचा आढावा घेत आवश्यक त्या सूचनाही केल्या.